Os mortos daquel verán - Carlos Casares

Título orixinal: Os mortos daquel verán
Ano: 1987
Editorial: Galaxia

Tradutor: --
Páxinas: 138
Ficha en Goodreads | Ver en Amazon

Os mortos daquel verán é unha novela curta, de menos de 150 páxinas, publicada por Carlos Casares en 1987. Está composta  por varios informes sobre a investigación que se abre cando un home da vila comeza a dicir que o boticario Ernesto Vilariño Dacal, atopado morto ao comezo da Guerra Civil, non morrera de accidente como se dixo senon  que fora asasinado..

O certo é que Os moros daquel verán recordoume tanto a Réquiem por un campesino español, polo tema que trata, como a Crónica de una muerte anunciada, pola forma en que o fai.

O lector le só os informes enviados por un funcionario descoñecido aos seus superiores nos que relata as distintas entrevistas do dito funcionario coas persoas relacionadas en maior ou menor medida coa súa investigación. Entre esas persoas atopamos versións moi diferentes e case contraditorias nalgúns casos, máis non é difícil averiguar cales son as causas destas diferenzas a medida que vai avanzando o libro.

Canto máis lemos máis imos coñecendo a historia da vila e os distintos enfrontamentos que houbo nos últimos anos: altercados en procesións, actos vandálicos na igrexa, supostas milagres, maltratos por parte do patrón aos obreiros da súa fábrica… A investigación, malia o que poida parecer, non se centra en se son certas as acusacións de que o boticario atopado morto foi asasinado ou non, senón no home que anda a extender este rumor pola vila e o seu comportamento en cada unha destas situacións.

O feito de que o libro enteiro esté composto polos escritos do funcionario fai que a linguaxe empregada sexa moi especial. Carlos Casares consegue no lector a sensación de estar lendo documentos xurídicos malia que non emprega verbas propias da xerga. Por isto a letura pode resultar un pouco difícil se non se le con atención, sobre todo ao principio do libro cando o lector aínda non está afeito ao estilo.

A pesar disto, Os mortos daquel verán é un libro que se le de forma áxil e que mantén o interese do lector en todo momento. É unha novela que xoga coa liña entre a verdade e a mentira xa que non se sabe a ciencia certa cal é a realidade soterrada entre tanta versión malia que non é difícil chegar a unha conclusión sobre o máis básico.

Un libro que recomendo.